ဝ က နှစ် ၃၀ ရခိုင်ဆိုကေ ၁၀ နှစ်

ကမ္ဘာ့နိုင်ငံရို့ ၏နိုင်ငံရီးအဆင့်အတန်းတိသတ်မှတ်ထားမှုရှုဒေါင့်ကကြည့်ကေ အလယ်အလတ်သီးခြားလွတ်လပ်တေနိုင်ငံအဆင့် (Semi-independent state) ဟိရေ “၀” ပြည်စွာ နှစ် ၃၀ ကာလအတွင်းမှာ တဲစုတ်ရာဟိရေဖုန်ဆိုးမြီကနိန် တိုးတက်ဖွံ့ ဖြိုးခေတ်မီခြင်းကိုလက်ဆုပ်လက်ကိုင်ပြနိုင်ရေ မော်ဒန်နယ်ပယ်သစ် ဖြစ်လာရေ။

နိုင်ငံ့စီးပွါးရီးတိုင်းတာချက်တိဖြစ်တေ ကုန်ထုတ်စွမ်းရည်၊ ဈီးကွက်ဝယ်လိုအား၊ လူသားအရင်းအမြစ်၊ သဘာဝအရင်းအမြစ်၊ ဓနအင်အား၊ နည်းပညာတိုးတက်မှုနန့် လူနိန်မှုအဆင့်အတန်း ဆိုရေ ပေတံနန့်  “၀” ပြည်ကို နှိုင်းယှဉ်တိုင်းတာကြည့်ကေ မြန်မာနိုင်ငံမှာ တိုးတက်မှုအမြင့်ဆုံးဒေသ ဖြစ်နိန်စွာကို တယောက်ချေလေ့ မငြင်းနိုင်ပါ။ လွတ်လပ်ခြင်း၊ တရားဥပဒေစိုးမိုးမှုနန့် တည်ငြိမ်မှုဟိခြင်းကြောင့်ရာ စီးပွါးရီးဖွံ့ ဖြိုးလာတတ်လို့  “ဇာဖြစ်လို့  “၀” လူမျိုးရို့ အဂုပိုင် တိုးတက်လာစွာလဲ” ဆိုရေ မိန်းခွန်းကို အဖြေတခုတည်းရာပီးရဖို့ ဆိုကေ “အမျိုးသားကိုယ်ပိုင်ပြဌါန်းခွင့်” ဟိလို့ ပင်ဖြစ်တေလို့  ပြောရပါဖို့ ။ အချူပ်အခြာအာဏာပိုင် “၀” ပြည်သူတိအထက်မှာ တခြားဇာလူမျိုးလေ့မဟိခြင်းက “၀” ရို့ ၏နိုင်ငံရီး၊စီးပွါးရီး၊ လူမှုရီး၊ ယိုင်ကျေးမှုနန့် ပညာရီးဆိုင်ရာ ကိစ္စရပ်တိအားလုံးကို “၀” ကရာ ဆုံးဖြတ်နိုင်ပနာ သူရို့ အနာဂတ်ကို တည်ဆောက်လာနိုင်ခြင်းက “၀” ပြည်တိုးတက်ခြင်း၏အဓိကအရေးအကြီးဆုံးအချက်တခု ဖြစ်နိန်ပါရေ။ လွတ်လပ်ခြင်းနန့် တိုးတက်ခြင်းစွာ ဒင်္ဂါးတစ်ပြား၏ပန်းနန့် မျောက်ပိုင် ခွါထားမရရေ အရာတိဖြစ်နိန်ရေခါ တိုးတက်ချင်ကေ လွတ်လပ်ရီးရအောင်ရာ အယင်လုပ်ကတ်ပါလို့  တိုက်တွန်းရပါဖို့ ။

အဂုလက်ဟိ မြန်မာနိုင်ငံ၏ပညာရီးအဆင့်အတန်းစွာ ၄.၇ နှစ် ရာ ဟိရေခါ လူတစ်ဦးချင်းစီ၏စာတတ်မြောက်မှုနှုန်းစွာ လေးတန်းအောင်အဆင့်ရာဟိပါရေ။ အေချင့်စွာ ၁၉၅၀ ၀န်းကျင်ကာလက ပြင်သစ်နိုင်ငံ၏ကျေးလက်ဒေသမှာဟိရေ ပညာရီးအဆင့်အတန်းနန့် လားညီနိန်ပါရေ။ မြန်မာနိုင်ငံမှာအဆင်းရဲဆုံး၊ ဗမာဒေသတိက လူနိန်မှုအဆင့်အတန်းထက် နှစ်ဆနိမ့်ကျနိန်ရေ ရခိုင်ပြည်မှာဆိုကေ စာတတ်မြောက်မှုက ၁.၇ နှစ်ရာဟိနိန်ပါရေ။ ၀ချေတန်းအောင်စ ရက္ခိတလို့ ရာ ပြောရပါဖို့ ။ လူတစ်ယောက်စာမတတ်ခြင်းစွာ ယင်းလူ၏အပြစ်တ၀က်မကင်းလို့ ပြောနိုင်ကေလေ့ ပြည်သူလူထုတစ်ရပ်လုံးစာမတတ်ခြင်းစွာ အစိုးရတာဝန်ဖြစ်လာပါရေ။ ဗမာဖက်ဆစ်နယ်ချဲ့ အုပ်ချူပ်ရီးအောက်မှာ ရခိုင်ပြည်သူရို့ ၏ဆင်းရဲမွဲတေဖွဲပြာကျစာမတတ်ခြင်းရေ ဗမာကျူးကျော်သူရို့ က တမင်တကာဖန်တီးပီးထားရေ လူမှုကပ်ဆိုးကြီးဆိုစွာကတော့ကေ အပိုပြောဖို့ လိုလီဖို့ မထင်ပါ။ ရခိုင်ပြည်သူရို့ စာတတ်ချင်ကေတော့ တာဝန်ခံတာဝန်ယူနိုင်မှုအပြည့်ဟိရေ ရခိုင်အစိုးရ ဟိဖို့ လိုပါရေ။

လွတ်လပ်ခြင်းနန့် အမျိုးသားကိုယ်ပိုင်ပြဌါန်းခွင့်ကို လက်ဆုပ်လက်ကိုင်ရလားရေ “၀” ပြည်က နှစ် ၃၀ မှာ တိုးတက်လားခကေ ခေတ်အဆက်ဆက် ဘက်ပေါင်းစုံက ဗမာကျူးကျော်သူရို့ စနစ်တကျ ဖိနှိပ်ဂုတ်သွီးစုပ်နှိပ်စက်ဖျက်ပါလတ်တေ ဖွဲရီကျရခိုင်ပြည်က ဖွံ့ ဖြိုးတိုးတက်လာဖို့  ဇာနှစ်နှစ်လောက်လိုပါဖို့ လဲချင့်။ နိုင်ငံထူထောင်လာခြင်းအတွိအကြုံနန့် သမိုင်းဖြတ်သန်းမှု၊ ရခိုင်လူထုမှာဟိရေ သီးခြားအမျိုးသားဝိသေသ လက္ခဏာအင်္ဂါရပ်နန့် ဘုံစိတ်ဓါတ်၊ သဘာဝအရင်းအမြစ်နန့် ပင်လယ်ထွက်ပေါက်ဟိခြင်းတိကိုစိုင်းစားထည့်တွက်ပနာ ပြောရကေ ပြာပုံထက်မှာ သုခဘုံဖြစ်လာဖို့ က အနည်းဆုံး ၁၀ နှစ်တော့ကေ လိုပါဖို့ ။

ယေကေလေ့ လွတ်လပ်ရီး၊ အချူပ်အခြာအာဏာနန့် အမျိုးသားကိုယ်ပိုင်ပြဌါန်းခွင့်တိရလာကေ အေချင့်တိကို အယင်ဆုံးကာကွယ်ထိန်းသိမ်းလားတတ်အောင် ကြိုးစားလားကတ်ရပါဖို့ ။ တိုးတက်ဖွံ့ ဖြိုးရေ မော်ဒန်အမျိုးသားနိုင်ငံဖြစ်လာဖို့ က နယ်မြီဒေသနန့် ရုပ်ဝတ္ထုပိုင်းဆိုင်ရာလွတ်လပ်ခြင်းနန့် မပြီး စိတ်ဓါတ်ပိုင်းဆိုင်ရာ လွတ်လပ်ဖို့ လေ့ လိုအပ်ပါရေ။ ယေဇုနန့်  ဗမာကျူးကျော်နယ်ချဲ့ တပ်ကို လက်နက်စွဲကိုင်တိုက်ထုတ်ပနာ ဗမာဖက်ဆစ်နယ်ချဲ့ စနစ်ကို ရခိုင်ပြည်မှာ အမြစ်ဖြတ်နိဂုံးချုပ်လိုက်စွာနန့် ကိစ္စအားလုံးမပြီး ဗမာဖက်ဆစ်ကျူးကျော်ရို့ ခေတ်အဆက်ဆက်မှိုင်းတိုက်ပါလတ်တေ လူမျိုးရေးအစွန်းရောက်မှု၊ ဘာသာရေးမုန်းတီးမှု၊ ဒေသစွဲ ပုဂ္ဂိုလ်စွဲ ဂိုဏ်းဂနစွဲဟိမှု၊ ရီသာခို အချောင်လိုက် အခြင်းပြော ကိုယ်လွတ်ရုန်းတတ်တေ အခွင့်အရီးသမားဝါဒဆိုးတိကိုပါ ဆီးကြောသန့် စင်လားဖို့ လိုပါဖို့ ။ ဒေပိုင် ဗမာရောဂါဆိုးတိကိုက နိုင်ငံရီးအသိတရားနိုးကြားမှု၊ လူသားဖြစ်တည်မှုကို အသိအမှတ်ပြုလေးစားခြင်းနန့် လူသားဝါဒတိနန့် ရာ ဆီးကုလားကတ်ရပါဖို့ ။

အဂုတော့ကေ ဗမာကျူးကျော်တပ်က လူမျိုးရေးစစ်ဆင်နွဲပနာ ရခိုင်လူထုကို ထိုးစစ်ဆင်တိုက်၊ ရွာတိကိုလက်နက်ကြီးတိနန့် ပစ်၊ အစုလိုက်အပြုံလိုက်သတ်၊ ရခိုင်ရို့ ရှိဟောင်းအမွီအနှစ် ဘုရားပုထိုးစေတီတိကိုဖျက်နိန်ကတ်ပါရေ။ ကိုယ့်ကံကြမ္မာဖန်တီးခွင့်နန့် မွီးရာပါနိုင်ငံရေးအခွင့်အရေးအတွက် တိုက်ပွဲဝင်နိန်ရေ ရခိုင်အမျိုးသားလွတ်မြောက်ရေးလှုပ်ယှားမှုကို အမြစ်ပြတ်နှိပ်ကွပ်လားဖို့  ဗမာစစ်တပ်နန့်  ဒီမိုကရေစီအရီခြုံအန်အယ်လ်ဒီဗမာအစွန်းရောက်အုပ်စုက စနစ်တကျကြိုတင်ပြင်ဆင်ပနာ ဂျပန်ဖက်ဆစ်ကျူးကျော်စစ်ထက်ဆိုးရေ ဗမာကျူးကျော်စစ်ကို ဆင်နွဲနိန်ပါရေ။ စစ်ဖီးရှောင်ဒုက္ခသည်ပေါင်း သုံးသောင်းကျော်၊ အသတ်ခံထားရစွာက ရာကျော်၊ အဖမ်းခံထားရစွာကလေ့ ရာချီ၊ မီးတိုက်ခံထားရရေ ရွာတိကလေ့ အများကြီးဖြစ်လာခြင်း အရှင်ငရဲအိုးကို ဒေထက်ဆူအောင် ဗမာကျူးကျော်ရို့ လုပ်လာနိုင်ပါရေ။

ယေဇုနန့်  အမျိုးသားညီညွတ်ရီးကို နှနှောင်းဆုပ်ကိုင်ပြီးကေ ရခိုင်တမျိုးသားလုံးအတွက် နောက်ဆုံးနိုင်ငံရေးတိုက်ပွဲဖြစ်တေ ဒေရခိုင့်အမျိုးသားလွတ်မြောက်ရေးလှုပ်ယှားမှုကြီးကို အားလုံးဝိုင်းရံဝင်ပါပူးပေါင်းပနာ အောင်မြင်မှုပန်းတိုင်ကို ချီတက်လားကတ်ဖို့ လိုပါရေ။ ဒုက္ခမုန်းတိုင်းအခက်အခဲစစ်ပွဲတိကြားမှာ လွတ်လပ်ခြင်းအခွင့်အလမ်းတိ ဟိနိန်ခြင်းရေ နိုင်ငံရေး၏ပင်ကိုယ်ပရိယာယ်ဖြစ်နိန်လို့  သန်းခေါင်လွန်ကေတော့ အနောက်နီမင်းကို လှမ်းမြင်လာကတ်ရဖို့ စွာက ကျိန်းသီနိန်ပါရေ။။။

ဝံလက်နီ

၁၉၊ ၀၄၊ ၂၀၁၉

Leave a Reply

Your email address will not be published. Required fields are marked *