“မိုးကောင်းရေပိုင် တိုက်ပွဲတိလည်းကောင်းလာနိုင်ရေ”

"မိုးကောင်းရေပိုင် တိုက်ပွဲတိလည်းကောင်းလာနိုင်ရေ"


Algebric Geometry အက်ဂျီဘရာ-ဂျီအော့မက်ထရီ (သချာင်္ ၂) မှာ "Theoryသီအိုရီတိကို 
သက်သီပြဖို့ Postulate ပေါ်စကျူလိတ်တိလိုရေ" ဆိုစွာကိုသင်ခရရေ။ ဥပမာ။ ။မျဉ်းပြိုင်နှစ်ကြောင်းကို ဖြတ်မျဉ်းတစ်ကြောင်းကဖြတ်ရေအခါ ယင်းမျဉ်းပြိုင်နှစ်ကြောင်း အထဲကဖြတ်မျဉ်း၏အတွင်းထောင့်နန့် အပြင်ထောင့်စွာ ဒီဂရီတူရေ။

ယင်းပိုင်ဗျာယ် အေအေလည်း တိုက်ရည်ခိုက်ရည်ကောင်းရေဆိုစွာကိုသက်သီပြဖို့ ဂဏန်းသုံးလုံးနန့် ရန်သူ့တပ်ရင်းတိကို ကံစမ်းမဲဖောက်ဖို့လုပ်နီရေ။တြိဂံတစ်ခု၏ အတွင်းထောင့်သုံးခုပေါင်းရေ ၁၈၀ ဒီဂရီဟိရေ။ ဇာတြိဂံမှာပေါင်းပေါင်း။ အနားညီတြိဂံပဲဖြစ်ဖြစ်၊ အနားမညီတြိဂံမှာပဲဖြစ်ဖြစ် အတွင်းသုံးထောင့်ပေါင်းကေ ၁၈၀ ဒီဂရီရရေ။ အိပ်လို့ပေါင်းပေါင်း တိုက်လို့ပေါင်းပေါင်း ၁၈၀။

(FPNCC) ပြည်ထောင်စုနိုင်ငံရေး ဆွေးနွေးညှိနှိုင်းရေး ကော်မတီ “Federal Political Negotiation and Consultative Committee. မပေါ်ခင်က ကိုးကန့်၊ တအာင်း(ပလောင်) ရခိုင်မဟာမိတ်ညီနောင်တိရေ တြိဂံတစ်ခု၏ အတွင်းထောင့်သုံးခုပေါင်းကေ ၁၈၀-ဒီဂရီရရေပိုင် ။ပစ်တိုင်းထောင်ပိုင် ဇာအချိန်ပစ်ပစ် ထောင်လို့ကျရေ။ မဟာမိတ်၊ ကိုယ်ချင်းစာတရား၊ သစ္စာတရား၊အပြန်အလှန်ယုံကြည်နားလည်မှု၊ လက်တွိကျကျပူးပေါင်းဆောင်ရွက်တိုက်ပွဲဝင်ကတ်စွာတိမှာ တြိဂံတစ်ခု၏ အတွင်းထောင့်သုံးခုပေါင်းကေ ၁၈၀-ဒီဂရီရရေပိုင်။ တိုက်ဆိုတိုက်။ နှစ်ဆိုနှစ်။

နောက်တစ်ခါ အခြီအနီ၏လိုအပ်ချက်အရ Northern Alliance (Burma)-NAB မြောက်ပိုင်းမဟာမိတ်တပ်ဖွဲ့အနီနန့် စုဖွဲ့မှုတိဟိခါလေ့ စတုရန်းတစ်ခုပိုင် အဖြေထွက်ခရေ။ သုံးသုံးလီကိုးကနီ,လေးလေးလီ ဆယ့်ခြောက်ဖြစ်ခရေ။ အခု, ခုနစ်ခုနစ်လီလေးဆယ့်ကိုးဖြစ်လာရေဆိုခါ ငါးဆယ်ပြည့်ဖို့တစ်ခုရာလိုဗျာယ်။ ဗမာပြည်ကို ၁၀၀ (တစ်ရာ) ထားကေ ရဟိထားရေ လေးဆယ့်ကိုး(၄၉) စွာ ၁၆-ပဲရွှီရည်ပိုင် မှတ်ကျောက်ခံဖို့ဆိုကေ နှစ် ၆၀ ကျော်ကြာ ပြည်တွင်းစစ်လည်း ကောင်းမကြာကိစ္စပြတ်လားနိုင်ရေ။

အေခုအစိုးရအတွက်လည်း အလျော်အစားကြီးလားနိုင်ရေ။ မဆမဒိုင်ကိုင်ချိန်မှာ ထိုးသားတိအနီနန့်လေ့ ဇကန်းပြန်ချိန်ကိုရောက်နီရေဆိုခါ လက်ဗလာတစ်ခုလေ့မပါဘဲ ခါလီသတ်သတ် လင်းပြန်တက်မပယှောင် နောက်ပေါက်ကတက်ဖို့လူတော့မဟိလောက်။ ယင်းအထဲမှာ "အိမ်ကြီးရခိုင်" ဆိုရေစကားကတော့ အလကားပေါ်လာစွာမဟုတ်ရေပိုင် ရန်သူကို"မဟာရခိုင်"ဆိုစွာကို ကျောင်းမှန်း၊ကန်မှန်း၊ဇရပ်မှန်း သိအောင်တော့ " တစ်ပွဲတော့ ဆွဲကတ်ဖို့နှန်းရာ"။ "အဝစားရခိုင်မပါ"ကေလေ့ မြို့သိမ်းတိုက်ပွဲ လေး/ငါးပွဲလောက်ပါကေရရာ။

FPNCC - ၇- ဖွဲ့ဖြစ်လာရေအခါ ပီးထားချက်တိပိုစုံလာရေ။ သချာင်္သဘောအရ ပုစ္ဆာတစ်ခုကို အဖြေတွက်ရေအခါ ပီးထားချက်အနည်း/အများ မသိကိန်းအနည်း/အများအပေါ်မူတည်ပနာ အဖြေရှာရစွာရေ ခက်ရေ။ လွယ်ရေ။ ပီးထားချက်များကေတော့ အဖြေထွက်စွာမြန်ရေ။ ပီးထားချက်နည်းကေတော့ မသိကိန်းတိထားပနာ လိုချင်ရေ အဖြေကိုရဖို့တွက်ရရေ။ တိုင်ပတ်နီကေတော့ ဗမာပြည်ပြည်တွင်းစစ်ပိုင် သက်တမ်းရှည်နီလီဖို့။

ရန်သူကတော့ စားနီကြကြောင်ဖား၊ လုပ်နီကျအလုပ်ဖြစ်တေ သပ်သျှိုဖြိုခွဲခြင်းအမှုကို ထပ်လုပ်နီရေ။ တောမီးတိုက်ရေပိုင် ကြတ်ပြေးကိုချန်ထားပနာ ဗမာပြည်အလယ်တဝိုက်ကို အအီးထားပနာ ကျန်ရေ ကျနော်ရို့ လူမျိုးတိနယ်မြီကို မငြိမ်မသက်ဖြစ်အောင် တစ်ခုမဟုတ် တစ်ခုနန့်ခြောက်လှန့်ထားရေ။

စာတော်-စာရရေကျောင်းသား/သူတိစွာ ဆရာ-ဆရာမက ပုစ္ဆာတစ်ပုဒ်ပီးကေ နှစ်ပုဒ်လောက်တွက်ပလိုက်ချင်ရေ။ သုံးပုဒ်တွက်ခိုင်းကေ သင်ခန်းစာတစ်ခုလုံးကို တွက်ပလိုက်ချင်ရေ။ယင်းပိုင်ဗျာယ် လက်နက်၊ ရဲဘော်အင်အား ၊စိတ်ဓာတ်၊ ခံယူချက်အပြည့်ဟိနီရေ တိုင်းရင်းသားလူမျိုးသူပုန်တပ်ဖွဲ့တစ်ဖွဲ့စွာလေ့ ရန်သူ၏ဇာစခန်းကိုသိမ်းပလိုက်ရဖို့ မဟာဗျူဟာကွန့်မြူးနီရေ။ လက်ယားနီရေ။

AK-47 (7.62×39 mm)ကျည်ကိုဖင်ထိုင်ခုလို့တိုက်ဖူးရေ ရဲဘော်တိအတွက် အခုဆိုကေ,လီယိုဉ်ပစ်သနတ်အပါအဝင် အခြားစွာတိပါဟိနီရေအပြင် မဟာမိတ်စုဖွဲ့မှု က အားကောင်းနီရေ။ ယင်းပိုင်မဖြစ်ဖြစ်အောင်စစ်ရီးဖိအားအပါအဝင် ဖိအားမျိုးစုံတိကို ဆက်တိုက်ပီးနီကေတော့အေမိုးကုန်ဖို့လားလို့တောင် တွေးနီရေ။ဗမာစစ်တပ်လေ့ ကောင်းရှာနီပိုင်တွိရေဂါး။

ကချင်တကျော့ပြန်တိုက်ပွဲ၊ ကိုးကန့်နိတိုင်းတိုက်ပွဲ၊ တအာင်းရက်ပြတ်တိုက်ပွဲ၊ ရခိုင်တစ်ခါတစ်လီ တိုက်ပွဲတိထဲက အားနည်းချက်တိကို ပြင်ဆင်ယင်း အားခဲထားရေ။ အားမွီး ထားရေ။မဖတ်ရသိမ့်ရေ စာအုပ်တိုင်းဟာ အသစ်ဆိုရေပိုင် မဖြစ်နိုင်စွာတိ၊ မဖြစ်သိမ့်စွာတိရေ ကောင်းမကြာခင် ဖြစ်လာဖို့ထင်ရေ။ မြင်လေ့မြင်နီရေ။ တစ်ခုက ဗမာစစ်တပ်ထဲက ကျောင်းနီဖက်ကိုယ်ရို့ လူမျိုးတိကို နက်ဖခါနီထွက်စွာ မြင်လားစီချင်ရေ။

ကိုယ့်ညီအစ်ကိုရို့ ... မယုံမဟိကေ့။ အေဂုပိုင် ဗမာစစ်တပ်ဖက်ကနောက်ထပ် ထပ်လို့ ထိုးစစ်ဆင်နီမှုတိကို ဆက်လို့လုပ်နီကေတော့ မကြာခင် (အေနှစ်)မိုးကောင်းနီရေပိုင် ပွဲလည်းကောင်းလာနိုင်ရေ။ "အဂယောင့်ပြောစွာ"။တစ်ယောက်လေ့ နှစ်သက်မပါ။ ကျနော်တစ်ယောက်ရာနှစ်သက်ပါရေ။ တစ်သက်က အဘာအမင်ပီးခရေ နာမည်ထဲက "တစ်သက်" ။ နောက်တစ်သက်ကရှင်သန်ခွင့်ကိုရဟိနီရေအချိန်မှာ ရထားရေ "တစ်သက်"။

ယေဘုယျ လူတိုင်းကိုယ့်အသက်ကိုနှမြောကတ်တေ။ ယင်းပိုင်ဗျာယ် ရန်သူတိအတွက် ဗမာစစ်တပ်ထဲကရခိုင်လူမျိုးတိအသက်ကို ထပ်မဆုံးယှုံးချင်ရေ ဆန္ဒတော့ဟိရေ။ယေကေလေ့ ကိုယ့်လူမျိုးရို့ က ရန်သူအတွက် အရိုးကြီကြီ အသက်ပီးပီးအလုပ်လုပ်နီကတ်ရေဆိုခါ အိုးဖင်မှာတော့ လက်တစ်ဖက် တင်ထားလိုက်ဗျာယ်။

ရခိုင်လူမျိုး Dr.ညိုထွန်းအောင်
၂၀၁၇ ခုနှစ်၊ ဇူလိုင်လ (၂၃) ရက် ၊ တနင်္ဂနွီနိ။
မိုးထ ရှစ်နာရီ နှစ်ဆယ့်ငါးမိနစ်။

 

 

Share

Leave a Reply

Your email address will not be published. Required fields are marked *