“အကျင့်”

ဘဝကို…….
လက်ညိုးထိုးပနာအန်ထုတ်ပစ်ချင်ကေလေ့
မျိုထား ဆို့ထားရေအစာဟောင်းတိက
ငါ့လိုင်ခြောင်းဝမှာ ထီးနီရေ။

ပြောမှသိ ၊ ထိမှနာ
သာမှနီ ၊ သီမှခင် တတ်ကတ်တေ
လူစားမျိုးဆိုစွာက
မပြောကေမသိ မထိကေမနာတတ်စွာ
လူ့သဘာဝတစ်ခုရာမလားယေ။

ယေဒါလေ့သင့်
ဟြှက်ပင်ချေတိပိုင်
တို့လိုက်တိုင်း ဖြိန့်နီပြန်ကေလေ့
ဘဝမှာ တစ်ခုလေ့မလုပ်ခရဘဲ
ကုန်မှန်းမသိ ကုန်ဆုံးလားလီဖို့။

တစ်ခါတစ်လီ
မှားနီစွာလေ့ မှန်တတ်ရေပိုင်
မှန်နီစွာလေ့ မှားလားတတ်ရေ
အမှားတိကိုတောင်မှ
အမှန်အမှန်လို့ ပြောဖန်များလာရေခါ
မှန်လားတတ်တေသာဓကတိ
ဒေကနိခေတ်မှာ အများကြီးပါရာဝေ……..။

ဘဝကို အလိုမကျမှုတိနဲ့
ဖြတ်သန်းနီရရေအချိန်တိမှာ
ပရံလူစွာ မိတ်ဆွီဖြစ်လာရေပိုင်
မိတ်ဆွီစွာလေ့ ပရံလူဖြစ်လားတတ်တေ
လောကနီတိကို ကြီညက်ထားကေလေ့
ပစ်လိုက်တိုင်းလွဲနီရေ သနတ်ပယှောင်
ချိန်သားအမှန်ကိုရဖို့တော့
ငါ့ကိုယ်ငါ ကျင့်ရဖို့သိမ့်ကာ…….။

ရခိုင်လူမျိုး Dr.ညိုထွန်းအောင်
၂၀၁၄ ခုနှစ်၊ ဒီဇင်ဘာ (၆) ရက် ၊ စနီနိ။

Share

Leave a Reply

Your email address will not be published. Required fields are marked *