“ရက္ခိတလမ်းစိုင်နန့်  ရခိုင်အမျိုးသားလွတ်မြောက်ရီး”

ရက္ခိုင့်တပ်မတော် ဆိုရေ အမည်နာမ စကားလုံးချေတစ်လုံးနောက်မှာ နှစ်ပေါင်းရာနန့် ချီပါလတ်တေ ရခိုင်အမျိုးသားလွတ်မြောက်ရီးနန့် ရခိုင်နိုင်ငံတော်ကို ပြန်ထူထောင်ရီး ဆိုရေ သမိုင်းကြောင်းကြီး ဟိနိန်ရေ။

ဂနိရခိုင်ရို့ တော်လှန်ရီးစွာ ဗမာပဒေသရာဇ်ဘိုးတော်မောင်ဝိုင်း စစ်မကြေညာပဲ ရခိုင်ပြည်ကို မတရားကျူးကျော်နယ်ချဲ့ ဝင်သိမ်းခြင်းကို ရခိုင့်နိုင်ငံတော်အချူပ်အခြာအာဏာနန့်  ရခိုင့်လူထုအသက်ကို ကာကွယ်ရီးအတွက် ခုခံတော်လှန်ခကတ်တေ ရခိုင့်တော်လှန်ရီးသူရဲကောင်းအဆက်ဆက်ရို့ နန့် ဆက်စပ်နိန်ရေ။

အဂုရက္ခိုင့်တပ်မတော်နန့် ဆက်စပ်နိန်ရေ သတင်းတိကို ဗမာမီဒီယာတိက ပုံဖော်ရေခါ သာမန်မကျေနပ်ချက်ဟိရေ ရခိုင်သားချေတိက နိုင်ငံရီး သဘောတရားလမ်းစိုင်မဟိပဲ ဗမာစစ်တပ်ကို ဆန့် ကျင်ပုန်ကန်နိန်ရေပိုင် ဗမာစစ်အုပ်စုက ဦးဆောင်လုပ်နိန်ရေ မျောက်ပြဆန်တောင်းငြိမ်းချမ်းရီးကို လားဖျက်နိန်ရေပိုင် ဘောင်သွင်းလာနိန်စွာကို တွိလာရရေ။ ရခိုင်ရို့ သမိုင်းအဆက်ဆက်နစ်နာမှု၊ အဂုမျက်မှောက်ကာလမှာလေ့ ကမ္ဘာမှာ တခုနိုင်ငံမှာလေ့မဟိ မကျင့်သုံးရေ ဂုတ်သွီးစုပ်ဖိနှိပ်မှုတိလုပ်နိန်ရေ ဗမာစစ်အုပ်စု၏စစ်ရာဇ၀တ်မှုတိကို ကျကေ မသိမသာနန့် သတင်းဖျောက်ထားပနာ ဗမာတိလုပ်နိန်ကတ်စွာရေ ကမ္ဘာကြီးတခုလုံးက ကြိုက်တေ ဒီမိုကရေစီဖော်ဆောင်ရေး ဆိုပြီးကေ အကွန်ဆောင်လိမ်နိန်ရေ။ ဗမာစစ်အုပ်စုပိုင်ရေ မီဒီယာတိက ရက္ခိုင့်တပ်မတော်ကို အမျိုးမျိုးစွပ်စွဲပနာ သိက္ခာချဖို့ ကြိုးစားနိန်ရေပိုင် ပြည်ပက ဗမာတိထိန်းချူပ်ထားရေ မီဒီယာတိကလေ့ ရက္ခိုင့်တပ်မတော်ကို သာမန်လက်နက်ကိုင်အုပ်စုချေပုံစံမျိုး ပုံဖော်ပနာ ကမ္ဘာ့အသိုင်းအ၀ိုင်းကို သတင်းမှားတိ ပီးပို့ တင်ပြပြီးကေ ဂျောင်ချေမှာ ထိုးထားဖို့ လုပ်နိန်ကတ်တေ။

၁၇၈၄ ခုနှစ်မှာ ပထမစက်မှုတော်လှန်ရီး (The First Industrial Revolution) ဥရောပမှာ ဖြစ်ပေါ်လာလတ်တေ အချိန်မှာ ဗမာက ရခိုင်ပြည်ကိုဝင်သိမ်းပြီးကေ ရခိုင်လူမျိုးကို လူ့ ယိုင်ကျေးမှုလမ်းမကြီးထက်က တိုးချလိုက်တေ။ နှစ်ပေါင်းငါးထောင်ကျော်ဖြတ်သန်းပါလတ်တေ ရခိုင်သမိုင်းဖြစ်စိုင်ကြီး ခွီးကိုက်ခံလိုက်ရရေ။ ဒေကာလကပင် ရခိုင်ရို့ အတွက်အနာရဆုံးအနာက ရုပ်ပိုင်းဆိုင်ရာကိုလိုနီလုပ်ခံရခြင်းမဟုတ်ပဲ စိတ်ပိုင်းဆိုင်ရာ ကိုလိုနီလုပ်ခံထားရခြင်း (The mental colonization) ဖြစ်ပါလတ်တေ။ ရခိုင်ရို့ လွတ်မြောက်ဖို့  ကြိုးစားမှုမှန်သမျှကို နည်းမျိုးစုံနန့်  ဗမာတိက ဖျက်ပါလတ်ကတ်တေ။ စိတ်ပိုင်းဆိုင်ရာ ချွတ်ခြုံကျပြီးကေ အချင်းချင်းညီညွတ်မှုမဟိပဲ ထိန်းမနိုင်သိမ်းမရ ပြိုကျလားရအောင် တခုပိုင်လေ့ပြန်ပြီးကေ နာလန်မထူနိုင်အောင် ဗမာတိက ပရိယာယ်ဆင် ဖျက်ပါလတ်ကတ်တေ။ စိတ်ဓါတ်တိသိမ်ငယ်ပနာ ရခိုင်ရို့  ဇာသူ့ ကို အားကိုးရဖို့ မှန်းမသိ…နောက်ဆုံး ဗမာတိကိုရာ ကျေးဇူးရှင် ကယ်တင်ရှင်လို့  မြင်လာကတ်အောင် ဗမာတိက စနစ်တကျ စိတ်ဓါတ်စစ်ဆင်ရေး လုပ်ပါလတ်ကတ်တေ။

ပွင့်ပွင့်လင်းလင်းပြောရကေ ရခိုင်လူမျိုးမှာ ရခိုင်နိုင်ငံတော် ကျရှုံးလားခရရေ အချိန်ကပင် ဂနိထက်ထိ အစိုးရ မဟိသိမ့်ပါ။ သိန်းစိန်ဂေါင်းဆောင်ရေ ဗမာစစ်အုပ်စုစွာ ရခိုင်အစိုးရမဟုတ်တေပိုင် နောက်တက်လာဖို့  ဗမာဒေါင်းအဖွဲ့ စွာလေ့ ရခိုင်အစိုးရ မဟုတ်ပါ။ ရခိုင်သား အများစုရေ အေသူရို့ ကို မဲပီးမရွီးခကတ်လို့  အေသူရို့ ကို ရခိုင်သားတိုင်းက အစိုးရလို့ မခေါ်သင့်ပါ။ ရခိုင်သားမှာ ရခိုင်ပြည်သူလူထုအကျိုးစီးပွါးကို ကူညီစောင့်ရှောက်ပီးလားဖို့  ရခိုင်အစိုးရ လိုအပ်နိန်စွာ အမှန်ပါ။

ဒေရာစုစွာ ရခိုင်ရို့ အတွက် နောက်ဆုံးရာစုဖြစ်တေပိုင် ရက္ခိုင့်တပ်မတော်က တိုက်ပွဲဝင် ရခိုင့်စစ်သည်စစ်သမီးတိကလေ့ နောက်ဆုံးမျိုးဆက်တိ ဖြစ်နိန်ရေ။ ယင်းအတွက်နန့်  ရခိုင်လူမျိုးအတွက် ဒေနောက်ဆုံးကာလမှာ ရခိုင့်အချူပ်အခြာအာဏာကို ပြန်ပနာ ရအောင်တိုက်ယူလာနိုင်စွမ်းဟိရေ၊ ရခိုင်ပြည်သူလူထု၏ကိစ္စအ၀၀ကို တာဝန်ယူတာဝန်ခံ ဖြေရှင်းပီးလာနိုင်ဖို့  ရခိုင်အစိုးရတာဝန်ကို ထမ်းဆောင်လာနိုင်ရေ သမိုင်းရွီးအင်အားစု ရက္ခိုင့်တပ်မတော်ကို ၀ိုင်းရံပီးခြင်းစွာ ရခိုင်ရို့ ခေတ်အဆက်ဆက် တောင်းဆိုပါလတ်ကတ်တေ လိုချင်ပါလတ်ကတ်တေ အမျိုးသားညီညွတ်ရီးကို လက်တွိကျကျ အကောင်အထည်ဖော်ခြင်းပင် ဖြစ်တေ။

တဖက်မှာ ဗမာကို တခုပိုင်လေ့ လျော့တွက်ထားလို့ မရ… ငါးမရကေတွင်းကိုဖျက်ဆိုရေပိုင် ရခိုင်ပြည်ကို လက်လွှတ်လိုက်ရဖို့ ဆိုကေ ပုံစံအမျိုးမျိုးနန့် ဖျက်လာနိုင်ရေ။ ယုတ်ညံ့စုတ်ပဲ့လွန်းရေ ဗမာတိုက်ကွက်တိုင်းကို တန်ပြန်တုံ့ ပြန်တိုက်လားနိုင်ဖို့ က ရခိုင်လူထုအားလိုအပ်တေ။ မ၀ီးရေ သမိုင်းတကွေ့ မှာ ဗမာစစ်တပ်၏လက်ဦးဆရာဖြစ်တေ ဖက်ဆစ်ဂျပန်ကို ရခိုင်လူထုက ရခိုင်ပြည်က ဆုံးမနှင်ထုတ်ခကတ်တေပိုင် ဂနိကာလမှာလေ့ ရက္ခိုင့်တပ်မတော်နန့် ဟန်ချက်ညီညီ လက်တွဲပြီးကေ လူထုတိုက်ပွဲဆင်နွဲဖို့  လိုအပ်နိန်စွာက အမှန်ပါ။ ရက္ခိုင့်တပ်မတော်က ချမှတ်ထားရေ ရခိုင်နိုင်ငံတော်ထူထောင်ရီး ရက္ခိတလမ်းစိုင်အတိုင်း ရခိုင်အမျိုးသားလွတ်မြောက်ရီးနန့်  ဗမာနယ်ချဲ့ ဆန့် ကျင်ရီးတိုက်ပွဲဝင်ကတ်ဖို့  ရခိုင်သားတိုင်း နိုးထသင့်ရေ အချိန်ကို ရောက်ပါလတ်ပါဗျာယ်။ ။ ။

ခိုင်အောင်အောင်
၇၊၃၊၂၀၁၆

Share

Leave a Reply

Your email address will not be published. Required fields are marked *