“ရက္ခိတရို့ ဘုံဝါဒ”

နိုင်ငံရေးဦးကျိုးလားရခြင်းနန့် တတူ အချူပ်အခြာအာဏာပါကျရှုံးလားရခြင်း၏ဆိုးကျိုးတိကြောင့် အနာတရယိုင်ကျေးမှု နန့် အစိုင်ပျက်လူ့ ဘောင်ဖြစ်ပါလတ်တေရခိုင်လူမျိုးရို့ ၏ ရာစုနှစ်စုကျော်ကျွန်ဖြစ်လာရခြင်းသံသရာကို နိဂုံးချူပ်အဆုံးသတ် နိုင်ဖို့  ဇာချင့်တိအရေးတကြီးလုပ်လားဖို့ လိုအပ်နိန်ပါလေ။ အမျိုးသားလွတ်မြောက်ရေးလှုပ်ရှားမှုကြီးကိုဆင်နွဲပနာ

အချူပ် အခြာအာဏာပိုင် ရခိုင်အမျိုးသားနိုင်ငံတော်ကို ပြန်လို့  တည်ဆောက်ပြီးကေ ရခိုင်ပြည်သူပြည်သားအားလုံးရို့ ၏ အသက် အိုးအိမ်စည်းစိမ်နန့် ဘ၀လုံခြုံမှုကို အာမခံချက်ပီးနိုင်ရေ တိုးတက်ဖွံ့ ဖြိုးခြင်းတိနန့်  ခေတ်သစ်တိုင်းပြည်ထူထောင်လားနိုင် ဖို့  အခြီခံနိုင်ငံရေးလမ်းစိုင်ဖြစ်တေ “ရက္ခိတရို့ ဘုံဝါဒ” လိုအပ်တေလို့ မြင်ရေ။ ဇာနိန်ရာဇာအရပ်ဒေသကိုပင်ရောက်ရောက် ဇာအလုပ် ကိုပင်လုပ်လုပ် ဇာအဖွဲ့ အစည်းမှာပင် တာဝန်ထမ်းဆောင်ဆောင် သီးခြားလွတ်လပ်တေ အချူပ်အခြာအာဏာ ပိုင်ရခိုင်အမျိုးသားနိုင်ငံတော်ကို ပြန်ပနာထူထောင်လားရေး ဆိုရေ နိုင်ငံရေးသဘောတရားလမ်းစိုင်ကို ရခိုင်သား ရခိုင်သမတိုင်း ယုံကြည်စွဲကိုင်အကောင်အထည်ဖော်လားခြင်းစွာ ရက္ခိတရို့ ဘုံဝါဒကို ကျင့်သုံးခြင်း လို့ အဓိပ္ပါယ်ဖွင့်ဆို နိုင်ရေ။

သမိုင်းစိုင်ဆက်တိုင်းပြည် (A Historical State) ကို နှစ်ပေါင်းငါးထောင်ကျော် ထူထောင်ပါလတ်ပြီးခါမှ အတွင်းပဋိပက္ခ ကြောင့် နိုင်ငံရေးညီညွတ်မှုပျက်ပနာ စစ်အင်အားပါကျဆင်းလားရရေအချိန်မှာရန်သူဗမာပဒေသရာဇ်ရို့ ၏ အကွက်ချောင်း ကျူးကျော်တိုက်ခိုက်ခြင်းကိုခံလိုက်ရလို့  စစ်ရှုံးတိုင်းပြည်ဖြစ်ပါလတ်ရရေ ရခိုင်ပြည်စွာ ဂနိအချိန်မှာ ဘက်ပေါင်းစုံက ယိုယွင်းနိမ့်ကျပျက်စီးနိန်ရရေ။ ကမ္ဘာ့နိုင်ငံသမိုင်းတိကို လေ့လာကြည့်လိုက်ကေ သမိုင်းဖြတ်သန်းမှုမြင့်မြင့်မားမား နန့် အစိုးရယန္တရားကို ရာစုနန့် ချီပနာ မှောင်းနှင်ပါလတ်ကတ်တေ တိုင်းပြည်နိုင်ငံတိုင်းစွာ ကံအကြောင်းမလှရေ သမိုင်း တကွေ့ မှာ ပရံလူမျိုးခြားရို့ ၏ကိုလိုနီလုပ်အုပ်ချူပ်မှုလက်အောက်ကို ရောက်ခရကေလေ့ ဒုတိယကမ္ဘာစစ်အလွန် နှစ်ဆယ်ရာစုအလယ်မှာ အမျိုးသားတော်လှန်ရေးဆင်နွဲပြီးကေ နိုင်ငံရေးလမ်းစိုင်ခိုင်ခိုင်မာမာနန့် အမျိုးသားနိုင်ငံတော် (A Political Nation) ကို ပြန်လို့ ထူထောင်ထားလာကတ်စွာကို တွိရရေ။ သမိုင်းစိုင်ဆက်တိုင်းပြည်တိစွာ အမျိုးသား နိုင်ငံတော်ဖြစ် လာကတ်တေ နိုင်ငံရေးသဘောသဘာဝဟိရေ။ သမိုင်းပုံရိပ်ကြီးမားခကေလေ့ မျက်မှောက်ကာလမှာ အမျိုးသားနိုင်ငံတော် မထူထောင်နိုင်သိမ့်ရေ လူမျိုးခြားတိဖိနှိပ် အုပ်ချူပ်မှုအောက်က ရခိုင်ရို့ ပိုင် နိုင်ငံမဲ့လူမျိုးတိ အကြောင်းကို လေ့လာကြည့်လိုက်ကေ နိုင်ငံရေးဘုံဝါဒ ကင်းမဲ့နိန်ကတ်စွာကိုလားတွိရရေ။ ခေတ်သစ်နိုင်ငံတော်ထူထောင် လားဖို့ ဆိုရေ နိုင်ငံရေးယုံကြည်ချက် ခံယူချက်ခိုင်ခိုင်မာမာနန့် သံဓိဌါန်ချထားခြင်း မဟိစွာကို တွိလာရရေ။ လူထုလူတန်းစားအလွှာအားလုံးပါဝင်ပနာ လူထုတိုက်ပွဲဖော်ဆောင်ရေ အမျိုးသားလွတ်မြောက်ရေးလှုပ်ရှားမှုတိုင်းက အမျိုးသားဘုံဝါဒတစ်ရပ်မှာ အခြီခံထားပြီးကေ လိုချင်ရေပန်းတိုင်ကို အရောက်လှမ်းလားကတ်တေ။ နိုင်ငံရေးဘုံဝါဒရေ အဖိနှိပ်ခံ ပြည်တွင်းကိုလိုနီ ကျွန်ဘ၀ကိုရောက်နိန်ရရေ တိုင်းပြည်နိုင်ငံလက်ကိုင်မဟိကတ်တေ လူမျိုးတိအတွက် ဇာဖြစ်လို့  ယင်းလောက်တောင် အရေးကြီးလဲဆိုစွာကို ရှင်းရှင်းလင်းလင်းသဘောပေါက်နားလည်ဖို့  ကမ္ဘာ့နိုင်ငံရေးနယ်ပယ်ထဲမှာ ဖြစ်ပေါ်ခရေ လက်တွိသာဓကတိကို လေ့လာကြည့်ကတ်ပါမေ။

ကမ္ဘာ့တော်လှန်ရေးတိ၏ဖခင်ကြီးလို့ တင်စားခေါ်ဝေါ်ကတ်တေ ပြင်သစ်တော်လှန်ရေးမတိုင်ခင်ကာလက ထွန်းကား ခရေ ဥာဏ်အလင်းခေတ်စွာ အအုပ်ချူပ်ခံ ပြင်သစ်ပြည်သူရို့ ဆင်နွဲခကတ်တေ အတွေးအခေါ် တော်လှန်ရေးတစ်ရပ် ပင်ဖြစ်တေ။ ယင်းခေတ်၏အကျော်အမော်နိုင်ငံရေးဒဿနပညာသျှင်ကြီး ရူးဆိုး (Rousseau) က “လူတစ်ဦးတစ်ယောက် ချင်းစီမှာ တခုနိုင်ငံရေးအာဏာလေ့မဟိ လူတိစုပေါင်းလိုက်ခါမှရာ နိုင်ငံရေးအာဏာဖြစ်လာရေ။ လူ့ အဖွဲ့ အစည်းတိုးတက် ဖွံ့ ဖြိုးရေးကို တားဆီးပိတ်ပင်ပနာ အထက်စီးကဂုတ်သွီးစုပ်နိန်ရေ သက်ဦးဆံပိုင်ဘုရင်စနစ်ဆိုးကို အဆုံးသတ်နိဂုံးချူပ်ပီး နိုင်ဖို့  အားလုံးကသဘောတူဝီမျှစုပေါင်းထားရေ လူထုဆန္ဒ (General Will) ဟိဖို့ လိုအပ်တေ” လို့ ထောက်ပြပြောခရေ။ ရူးဆိုးရွီးခရေ လူမှုပဋိဥာဏ် (Social Contract) စာအုပ်ထဲက ပြည်သူ့ ဒဿနဘုံဝါဒစွာ ပြင်သစ်တော်လှန်ရေး၏အဓိက နိုင်ငံရေးလမ်းစိုင် ဖြစ်ပါလတ်တေ။ သက်ဦးဆံပိုင်ဘုရင်စနစ်ဆိုးကို နိဂုံးချူပ်လိုက်နိုင်ပြီးကေ အချူပ်အခြာအာဏာစွာ ပြည်သူလူထုဘားကဆင်းသက်တေ တန်းတူရေး၊ လွတ်လပ်ရေးနန့် ညီကိုရင်းစိတ်ဓါတ်ဟိရေး (Equality, Liberty and Fraternity) ကိုအခြီခံတည်ဆောက်ထားရေ ပြည်သူ့ သမ္မတပြင်သစ်နိုင်ငံပေါ်ထွန်းလာခြင်းရေ အမျိုးသားနိုင်ငံရေးဘုံဝါဒ ကို စွဲကိုင်ကျင့်သုံးမှုကြောင့် ရပါလတ်တေ ရလဒ် ပင်ဖြစ်ပါရေ။

တတိုင်က ဘာသာတူ ယိုင်ကျေးမှုလေ့တူရေ အင်္ဂလိပ်အုပ်ချူပ်မှုအောက်မှာနိန်လားကတ်ဖို့  နောက်တတိုင်ကကျကေ သီးခြားလွတ်လပ်တေ အချူပ်အခြာအာဏာပိုင် ပြည်သူ့ သမ္မတနိုင်ငံထူထောင်လားဖို့  ဆိုရေ လမ်းနှစ်သွယ်ကြားမှာ အင်္ဂလိပ်ကျွန်ဘ၀ကိုရောက်နိန်ကတ်တေ အမေရိကန်ရို့  ဇာကိုလားလို့ လားရဖို့ မှန်းမသိ ၀ိရောဓိသံသယနန့်  ၀ီခွဲမရဖြစ်နိန်ကတ်တေအချိန် သောမစ်(ဇ်)ပိန်း (Thomas Paine) ရွီးရေ ဘုံအသိတရား (Common Sense) စာစောင်က လွတ်လပ်ရေးကရာ ထာဝရမှန်ကန်ရေလမ်း ဆိုပြီးကေ ဥာဏ်အလင်းထွန်း တိုက်တွန်းပီးလိုက်တေ။ “ဇာမဟုတ်တေ အင်္ဂလိပ်ကျွန်းချေတစ်ကျွန်းက အမေရိကပိုင် တိုက်ကြီးတစ်တိုက်ကို လွှမ်းမိုးချူပ်ကိုင် ကိုလိုနီလုပ်ထားစွာရေ အဓိပ္ပါယ်မဟိဝေး” (It was absurd for an island to rule a continent.) ဆိုရေ စကားက အမေရိကန်ရို့ ကို နိုင်ငံရေးနိုးကြားလားစီပြီးကေ သီးခြားလွတ်လပ်တေ သမ္မတနိုင်ငံထူထောင်ဖို့  ပြည်ချစ်ဝါဒ (Patriotism) ကို ချပီးခရေ။ သမိုင်းစိုင်ဆက်တိုင်းပြည် (A Historical State) မဟုတ်ကေလေ့ နိုင်ငံရေးသဘောတရားဘုံလမ်းစိုင်မှာ အခြီခံတည်ဆောက်ထားရေ အမျိုးသားနိုင်ငံတော် (A Political Nation) ကို အမေရိကန်တော်လှန်ရေးအပြီးမှာ ထူထောင်လာနိုင်ခြင်းက ဘုံဝါဒဟိခြင်း၏အကျိုးကျေးဇူးပင်ဖြစ်ပါရေ။

လူတိုင်းသိရေ သမိုင်းတခုက ဂျူးလူမျိုးရေ သမိုင်းဦးခေတ်ကပင် လူမျိုးခြားရို့ ၏ကျူးကျော်နယ်ချဲ့ တိုက်ခိုက်မှု တိကြောင့် စစ်ရှုံးလားရလို့  နိုင်ငံရေးဦးကျိုးပနာ လွတ်လပ်ရေးနန့် အချူပ်အခြာအာဏာ ပျောက်လားရပြီးကေ ခြီသလုံးအိမ်တိုင်ရွှင့်ပြာသတ်လူမျိုးအဖြစ်နန့်  ကမ္ဘာ့တိုင်းပြည်နိုင်ငံတိမှာ ခိုကပ်နိန်ခကတ်ရရေ။ နှစ်ပေါင်းနှစ်ထောင်နီးပါး ကိုယ်ပိုင်တိုင်းပြည်မဲ့ဘ၀နန့်  ဒိုင်ယာစပိုရာ (Diaspora) ဖြစ်လာကတ်ပြီးခါမှ ၁၉ ရာစုနှောင်းပိုင်းကို ရောက်တေခါ “ဂျူးလူမျိုးရို့ ကိုယ်ပိုင်တိုင်းပြည်ကို ပြန်ထူထောင်ရေး” ဆိုရေ ဇီယွန်ဝါဒ (Zionism) ကို ယုံကြည်စွဲကိုင်မိလာကတ်တေ။ ဒုတိယကမ္ဘာစစ်မတိုင်ခင် ဂျာမန်နာဇီတိဘားမှာ ဂျူးလူမျိုး ခြောက်သန်းကျော်အသတ်ခံခရရေ ခါးသီးလွန်းရေ သမိုင်းအနာနန့် စိတ်ဒဏ်ရာကြီးတိရလာကတ်ကေလေ့ သူရို့ ၏ဘုံဝါဒအတိုင်းချီတက်လာကတ်လို့  ၁၉၄၈ ခုနှစ်မှာ သီးခြားလွတ်လပ်တေ အချူပ်အခြာအာဏာပိုင်အစ္စရေးနိုင်ငံကို ထူထောင်လာနိုင်ခပါရေ။

တန်းတူညီမျှစစ်မှန်ရေ ဖယ်ဒရယ်ပြည်ထောင်စုတိုင်းပြည်ထူထောင်ရေး ဆိုရေ ပင်လုံသဘောတူညီချက်အတိုင်း လူမျိုးပေါင်းစုံ သူပုန်ထတော်လှန်ရေ လွတ်လပ်ရေးတိုက်ပွဲကိုဆင်နွဲခကတ်ပြီးကေ အင်္ဂလိပ်ကိုလိုနီအုပ်ချူပ်မှုအောက်က လွတ်မြောက်ပါလတ်တေ ခေတ်သစ်မြန်မာနိုင်ငံသမိုင်းကိုလေ့လာကြည့်လိုက်ကေ နိုင်ငံရေးဖြစ်ထွန်းမှုနှစ်ခု မျဉ်းပြိုင်လားနိန်စွာကို တွိရရေ။ ဗမာက ဗမာအမျိုးသားနိုင်ငံတော်တည်ဆောက်ရေး (Nation-Building) လမ်းကြောင်းကို လားနိန်ပြီးကေ တဖက်မှာ ဗမာမဟုတ်တေ လူမျိုးတိက ဥရောပသမဂ္ဂပုံစံပိုင် လူမျိုးအခြီပြု ဖယ်ဒရယ်တိုင်းပြည် ထူထောင်ရေး (State-Making) အတွက် တိုက်ပွဲဝင်နိန်ကတ်တေ။ ဗမာမဟုတ်တေလူမျိုးဖြစ်တေ ရခိုင်ကလေ့ ဖယ်ဒရယ်တိုင်းပြည်တည်ဆောက်ရေးဆိုရေ ဂေါင်းစိုင်ကြီးအောက်မှာ သိမ်းသွင်းခံလားရပနာ ပြည်ထောင်စုဖြစ်လာကေ ကိုယ်ပိုင်ပြဋ္ဌါန်းခွင့်ရလာလတ္တံ့ ဆိုရေ ၀ိုးတ၀ါးမျှော်လင့်ချက်နန့် လားနိန်ကတ်ရရေ။

မြန်မာနိုင်ငံကဗမာမဟုတ်တေ နိုင်ငံရေးတော်လှန်ရေးသမားအများစုစွာ နိုင်ငံတကာဖိအားနန့် ဦးနှောဏ်ဖောက်စားခြင်း ကိုခံရပနာ စစ်မှန်ရေဖယ်ဒရယ်ပြည်ထောင်စုတည်ဆောက်လာနိုင်ကေ ကိုယ်ပိုင်ပြဋ္ဌါန်းခွင့် ကိုယ်ကံကြမ္မာကိုယ်ဖန်တီး ပိုင်ခွင့်တိရလာဖို့ လို့ ထင်နိန်ကတ်တေ။ အဂုပိုင်ထင်မြင်ယူဆချက်တိစွာ ကမ္ဘာ့နိုင်ငံရေးနယ်ပယ်ထဲက လက်တွိနိုင်ငံရေး ဖြစ်ထွန်းလာမှုနန့် နှိုင်းယှဉ်လေ့လာကြည့်လိုက်ကေ လုံးဝမှားနိန်ကြောင်းကို လားတွိရရေ။ ဥပမာ- ဥရောပသမဂ္ဂအဖွဲ့ ဝင် ဂရိနိုင်ငံစွာ ၂၀၀၈ ခုနှစ်နောက်ပိုင်း စီးပွါးရေးကျဆင်းမှုနန့် ဘဏ္ဍာရေးအကျပ်အတည်းကို ရင်ဆိုင်လာရလို့  ကိုယ့်နိုင်ငံ တွင်းကစီးပွါးရေးပဋိပက္ခကို အဖြေရှာဖို့ ကြိုးပမ်းအားထုတ်တေခါ ကိုယ်ပိုင်စီးပွါးရေးနန့် ဘဏ္ဍာရေးပေါ်လဆီတိကို ချမှတ်ကျင့်သုံးပိုင်ခွင့်မဟိပဲ ဥရောပသမဂ္ဂနန့် ဥရောပဗဟိုဘဏ်က ချပီးရေ ဆုံးဖြတ်ချက်တိကိုရာ လိုက်နာကျင့်သုံး လာရရေ။ ဖယ်ဒရယ်၏အဓိပ္ပါယ်ကိုယ်နှိုက်က အဖွဲ့ ဝင်တိုင်းပြည်နိုင်ငံပြည်နယ်တိုင်းတိ၏အချူပ်အခြာအာဏာတိကို ဗဟိုဖယ်ဒရယ်အစိုးရဘားကို လွဲအပ်ပီးထားရဖို့ လို့ သဘောတူထားခြင်း ဖြစ်နိန်ရေခါ ကိုယ့်သားသမီး ကိုယ့်အိမ်ထဲမှာ ထမင်းငတ်နိန်ကေတောင် ဗဟိုကသဘောမတူကေ တခုလေ့ကူညီလုပ်ပိုင်ခွင့်မဟိပဲ အေအတိုင်းလက်ပိုက်ကြည့်နိန်လိုက် ရဖို့  နိုင်ငံရေးစနစ်တခု ဖြစ်နိန်ရေ။

တချို့ ရခိုင်တိကကျကေ မြန်မာနိုင်ငံမှာ ဒီမိုကရေစီစနစ် ရှင်သန်ခိုင်မာလာကေ ရခိုင်ရို့ ပါ အခွင့်အလမ်းတိရပနာ တိုးတက်လာဖို့ လို့ ထင်နိန်ကတ်တေ။ ပါလီမန်ဒီမိုကရေစီစနစ်ကို မွီးထုတ်ပီးလိုက်တေ အရပ်ဒေသဖြစ်တေ ဗြိတိန်မှာ အင်္ဂလိပ်အာဏာပိုင်ရို့ ၏အမျိုးမျိုးလိမ်လည်မှုကိုခံနိန်ရလို့  စကော့လူမျိုးရို့ ၏မွီးရာပါအခွင့်အရေးတိ ဆုံးရှုံးနိန်ရပနာ လွတ်လပ်ရေးကရာ တခုတည်းသောနိုင်ငံရေးထွက်ပေါက်ဖြစ်တေ ဆိုပြီးကေ တောင်းဆိုတိုက်ပွဲဝင်လာကတ်စွာကို တွိလာရရေ။ ဗမာအာဏာပိုင်တိကလေ့ ရခိုင်ပြည်ကို သူရို့ အကျိုးစီးပွါးအတွက် အုပ်ချူပ်ထားပနာ အဖိနှိပ်ခံရခိုင်ရို့  အရေးကို တခါလေ့ထည့်တွက်စိုင်းစားလီဖို့ မဟုတ်ဆိုစွာကို နားလည်သဘောပေါက်ထားသင့်ရေ။

ရာစုနှစ်စုခွဲကာလကို ၀င်ပါလတ်တေ ရခိုင်ရို့ နိုင်ငံရေးရောဂါရနိန်ခြင်းကို ပျောက်ကင်းအောင်ကုသနိုင်ဖို့ ၊ ရခိုင်ပြည်ထဲမှာ တစ်ရက်ထက်တစ်ရက်မြင့်ပါလတ်တေ ဆင်းရဲမွဲတေမှုအပါအ၀င်မညီမျှမှုပြဿနာကို ဖြေရှင်းလားနိုင်ဖို့ နန့်  ပြည်ပတိုင်းပြည်နိုင်ငံတိမှာ ရွိပြောင်းအလုပ်သမားခေတ်သစ်ကျွန်ဘ၀ကို ရောက်နိန်ကတ်ရရေ သိန်းနန့် ချီရေ ရခိုင်သားရခိုင်သမရို့ ကို ကယ်တင်လာနိုင်ဖို့ က အထက်ကနိဒါန်းပိုင်းမှာ ပြောခရေပိုင် “ရက္ခိတရို့ ဘုံဝါဒ” ကို စွဲကိုင်ကျင့်သုံးလားဖို့ လိုအပ်လာရေ။ ပစ္စက္ခကာလရခိုင်ရို့ နိုင်ငံရေးအခင်းအကျင်းကို လေ့လာကြည့်လိုက်ကေ ပါတီအဖွဲ့ အစည်းတိကြားမှာ နိုင်ငံရေးအရပူးပေါင်းဆောင်ရွက်မှုကင်းမဲ့နိန်တောင်မကသိမ့်လို့  သာမန်ပြည်သူတိကြား မှာလေ့ ရခိုင်အမျိုးသား နိုင်ငံတော်ကို ပြန်ပနာထူထောင်လားဖို့ ဆိုရေ ခိုင်မာရေသံဓိဌါန်ချထားမှုနန့် နိုင်ငံရေးလမ်းစိုင် မဟိစွာကို လားတွိရရေ။ အမျိုးသားညီညွတ်ရေးကို စကားလုံးသက်သက်နန့် ရာ ပြောနိန်ကတ်ပြီးကေ လက်တွိလုပ်ဆောင် ချက်မဟိရေခါ ကိုယ်လားရဖို့ လမ်းကို ကိုယ်တိုင်ဖျောက်နိန်ကတ်ပိုင် ဖြစ်လာရေ။ ဘုံဝါဒမဟိခြင်းစွာ ပြည်သူတစ်ရပ်လုံး မျက်စိကန်းနိန်ကတ်စွာနန့် တူနိန်ပြီးကေ လားဖို့ လမ်းဟိကေတောင် လားလို့ မရရေ အခြေအနေဖြစ်နိန်ရရေ။ နိုင်ငံရေးသဘောတရားမဟိပဲ အမျိုးသားလွတ်မြောက်ရေးလှုပ်ရှားမှုကြီးကို ဆင်နွဲလားဖို့ တခုပိုင်လေ့ မဖြစ်နိုင်လို့  အတွေးအခေါ်တော်လှန်ရေးနန့် ရက္ခိတရို့ ဘုံဝါဒ နိုးထထွန်းကားလာရေးကို အယင်ဆုံးဦးစားပီးလုပ်လား သင့်ရေ။ တတ်သိပညာသျှင်တိနန့် တော်လှန်ရေးအဖွဲ့ အစည်းတိက ဦးဆောင်ပနာ အမျိုးသားစီမံကိန်းတစ်ရပ်ရွီးဆွဲပြီးကေ ရခိုင်ရို့ နိုင်ငံရေးအဆင့်အတန်းကို မြှင့်တင်လားသင့်ရေ။

တိုင်းပြည်တစ်ပြည် လူမျိုးတစ်မျိုးအတွက် တန်ဖိုးအဟိဆုံးတန်ဖိုးက လွတ်လပ်ရေးပင်ဖြစ်တေ။ လွတ်လပ်တေလူမျိုး ကရာ တိုးတက်ဖွံ့ ဖြိုးခေတ်မှီရေ နိုင်ငံကို ထူထောင်နိုင်ရေ။ လွတ်လပ်ရေးရထားရေနိုင်ငံထဲက လူတိကရာ လူဖြစ်ခြင်း အရသာ အစစ်အမှန်ကို ခံစားနိုင်ပြီးကေ လူ့ ဂုဏ်သိက္ခာဟိလာရေ။ လွတ်လပ်ရေးဟိမှရာ အချူပ်အခြာအာဏာကို ပြည့်ပြည်၀၀ ကျင့်သုံးနိုင်ရေ။ အကျယ်ချဲ့ ပနာဆက်ပြောရကေ ဒေလွတ်လပ်ရေးနန့် အချူပ်အခြာအာဏာဟိလာခါမှရာ ကိုယ့်ကံကြမ္မာကို ကိုယ်တိုင်ပြဋ္ဌါန်းလာနိုင်ပြီးကေ ကိုယ်ရို့ လားချင်ရေ အနာဂတ်ခရီးလမ်းကို ဖြောင့်ဖြောင့်တန်းတန်း လားနိုင်ရေ။ သဘာဝအရ လူတိစွာ လွတ်လပ်ခြင်းအပြည့်နန့် မွီးလာကတ်ကေလေ့ လွတ်လပ်ရေးဆုံးရှုံးနိန်ရရေ နိုင်ငံနန့် လူမျိုးက ဆင်းသက်ပြီးကေ မျိုးဆက်သစ်ဖြစ်လာကတ်တေလူတိကိုတော့ကေ စနစ်တကျဂုတ်သွီးစုပ်လားဖို့  ပရံလူစနစ်ဆိုးကြီးက အဆင်သင့် စောင့်ကြိုနိန်တတ်တေ။ ဒေနှောင်ကြိုးက ကျွန်တံဆိပ်ကပ်လိုက်ပြီးကေ လူဖြစ်ရှုံး လူညွန့် တုံးပနာ လူတောမတိုးအောင် လုပ်ပီးလိုက်တေ။ ယင်းအတွက်နန့် ကျွန်ထောင်ချောက်ကို ဖြိုချပနာ ကျွန်နှောင်ကြိုးကို ဖြတ်ဖို့  အမျိုးသားလွတ်မြောက်ရေးတိုက်ပွဲကို ဆင်နွဲလာရရေ။

အမျိုးသားကိုယ်ပိုင်ပြဋ္ဌါန်းခွင့်ကို နိုင်ငံရေးလမ်းစိုင်တခုအဖြစ် ကိုင်စွဲပနာ ဆင်နွဲကတ်တေ အမျိုးသား လွတ်မြောက်ရေးတိုက်ပွဲ (War of National Liberation) ကို နိုင်ငံတကာထုံးတမ်းစိုင်လာဥပဒေက ဆန့် ကျင်ပုန်ကန်ခြင်း (Rebellion)၊ လက်နက်ကိုင်တော်လှန်ခြင်း (Insurgency)နန့် စစ်ဖြစ်နိန်ခြင်း (Belligerency) ဆိုပြီးကေ အဆင့်သုံးဆင့် သတ်မှတ်ပနာ အသိအမှတ်ပြုထားစွာကို လားတွိရရေ။ ကိုယ်ပိုင်တော်လှန်ရေးနယ်မြီနန့် ခံတပ် လုပ်ပြီးကေ နောက်ဆုံးအဆင့်စစ်ဖြစ်လာကေ နိုင်ငံတကာဥပဒေတိကို မှီငြမ်းကျင့်သုံးနိုင်ရေအဆင့်ကိုရောက်လားပနာ နိုင်ငံရေးပဋိပက္ခကို နိုင်ငံတကာတရားရုံးနန့် အဖွဲ့ အစည်းတိက ကြားဝင်ညှိနှိုင်းအဖြေရှာပီးရရေ အနေအထားကို ရောက်လားတတ်တေ။

ခေတ်သစ်ကမ္ဘာမှာ သီးခြားလွတ်လပ်တေနိုင်ငံဖြစ်လာဖို့  အခြီခံစံနှုန်းသတ်မှတ်ချက်တိကိုလေ့ အဂုပိုင်လားတွိရရေ။ ၁၉၃၃ ခုနှစ် ဒီဇင်ဘာလ ၂၆ ရက်နိန့်  ဥရုဂွေးနိုင်ငံ၏မြို့ တော် မွန်တာဗီတိုမှာ လက်မှတ်ထိုးခကတ်တေ မွန်တာဗီတို ညီလာခံ (Montevideo Convention) မှာ နိုင်ငံတကာဥပဒေတိကိုလိုက်နာကျင့်သုံးပြီးကေ ကမ္ဘာ့အသိုင်းအ၀ိုင်းမှာ ၀င်ဆန့် ရေ နိုင်ငံသစ်စွာ အမြဲတမ်းလူဦးရေဟိခြင်း (A permanent population)၊ သီးခြားသတ်မှတ်ထားရေ နယ်မြီဟိခြင်း (A defined territory)၊ အစိုးရ (Government) နန့်  တခြားတိုင်းပြည်နိုင်ငံတိနန့် ဆက်ဆံရေးလုပ်နိုင်စွမ်းဟိခြင်း (Capacity to enter into relations with the other states) တိ ပိုင်ဆိုင်ထားရဖို့ လို့  သဘောတူထားကတ်စွာကို လားတွိရရေ။ ကုလသမဂ္ဂကိုဖွဲ့ စည်းထူထောင်လာရေနောက်ပိုင်း ဒေဥပဒေစံနှုန်းတိကို ဆက်ပြီးကေကျင့်သုံးလာပနာ နိုင်ငံသစ်ဖြစ်ခြင်းကို အထွေထွေညီလာခံက အများသဘောတူဆုံးဖြတ်အသိအမှတ်ပြုကတ်စွာကို တွိလာရရေ။ ရခိုင်လူမျိုးမှာ တူညီရေ ယိုင်ကျေးမှု၊ သမိုင်းဖြတ်သန်းမှုနန့် နယ်မြီသတ်မှတ်ချက်ဟိကေလေ့ ရခိုင်လူမျိုးကိုယ်စားပြု ရခိုင်ပြည်ကိုအုပ်ချူပ်ပနာအစိုးရယန္တရားကိုလည်ပတ်မောင်းနှင်နိုင်တောင်မကသိမ့်လို့  တခြားတိုင်းပြည်နိုင်ငံတိ နန့် ပါသံတမန်ဆက်ဆံရေးလုပ်နိုင်ရေ နိုင်ငံရေးပါတီအဖွဲ့ အစည်းတခု မဟိခြင်းက ရခိုင်ရို့ ၏ရပိုင်ခွင့်နန့် အခွင့်အလမ်း တိကိုငြင်းပယ်ခံထားရမှုအတွက် အမျိုးသားလွတ်မြောက်ရေးလုပ်လား ဖို့ အခက်ကြုံလာကတ်တေ။ ရခိုင်ရို့ သမိုင်းသစ်ကို ရွီးလားဖို့  သမိုင်းရွီးအင်အားစုတစု လိုအပ်နိန်စွာက အမှန်ပါ။

အမြင်ရှင်းမှ လားရဖို့ လမ်းလေ့ရှင်းရေပိုင် ကိုယ်ရို့ ဆုပ်ကိုင်ရဖို့ မူဝါဒကို သဘောပေါက်ခါမှ ချီတက်ရဖို့ ပန်းတိုင်ကိုအရောက်မြန်ဖို့ ။ သမိုင်းဆိုစွာ ခါးတစ်ခါ ချိုတစ်လှည့် ဖြစ်တတ်တေ သဘာဝအမှန်တရားတခုဖြစ်နိန်လို့  ရှောင်လားလို့ မရ ဖြစ်ကိုဖြစ်လာဖို့  ရကိုရလာဖို့  ရခိုင်ရို့ လွတ်လပ်ရေး (Arakanese independence is inevitable.) အတွက် တတူနိုးထကတ်ဖို့ အချိန်ရောက်ပါလတ်ဗျာယ်။ ငါရို့ တိအားလုံး ဗမာကိုလိုနီစနစ်ဆိုးနိဂုံးချူပ်လားအောင် တိုက်ပွဲဝင်ရဖို့ ဆိုရေ ဘုံအသိနန့်  အများဆိုင်ကံကြမ္မာကို ဖန်တီးနိုင်ဖို့  ရက္ခိတရို့ ဘုံဝါဒကို စွဲကိုင်ပနာ အမျိုးသားလွတ်မြောက်ရေးတိုက်ပွဲကို ဆင်နွဲလားကတ်ပါလို့  တိုက်တွန်းနိုးဆော်ယင်း နိဂုံးချူပ်လိုက်ရပါရေ။ ။ ။

 

 

ခိုင်အောင်အောင်

ဒီဇင်ဘာလ ၄ ရက် ၂၀၁၅ ခုနှစ်

 

 

 

 

Share