“ဗမာစစ်သွီးကြွရို့  နီဝင်ချိန်

နိုင်ငံရီးအတု (၀ါ) ရီပေါ်ဆီနိုင်ငံရီးဇာတ်စင်ထက်မှာ သမ္မတရွီးပွဲ၊ အစိုးရအပြောင်းအလဲတိနန့်  တိုင်းရင်းသားပြည်သူ လူထုကို အစီအစိုင်တကျ အနံ့ ရှု ၀မ်းဝကတ်အောင် ကပြအသုံးတော်ခံနိန်ရေကာလ ဇာတ်စင်နောက်မှာတော့ကေ ဗမာစစ်သွီးကြွအုပ်စုက တိုင်းရင်းသားလူမျိုးတိကို မျိုးတုန်းမျိုးပြုန်းအောင် ရှင်းလားဖို့  မိုးပြာစစ်ဆင်ရီး၊ အောက်သားကောင်းစားရီး ထိုးစစ်တိလုပ်လားဖို့  စစ်အင်အားတိ အကြီးအကျယ်တိုးချဲ့ နိန်ပါရေ။

နှစ်ထောင့် ဆယ့်ခြောက်ကို ဗမာစစ်အုပ်စု ရွီးချယ်လိုက်စွာက စစ်ပွဲတိထပ်နိန်ရေ သမိုင်းစာမျက်နှာဆိုးရီးထိုးမော်ကွန်းတင်လိုခြင်းပင် ဖြစ်တေ။ စတုတ္ထဗမာအင်ပါယာထူထောင်ရီးအိမ်မက်ဆိုးနန့်  ဗမာအချူပ်အခြာအာဏာကျယ်ပြန့် လာစီရီးဆိုရေ မူလမ်းစိုင်အတိုင်း ကျူပင်ခုတ် ကျူငုတ်မကျန်စီရ ဆိုရေ ဗမာလူသတ်ဒမြ၀ါဒကို ကိုင်စွဲပနာ တိုင်းရင်းသား လူမျိုးရို့ လိုင်ဖင်းကို လှီးဖို့ လာနိန်ခြင်းကို ကိုယ်ရို့ အသက်ကို ကိုယ်ရို့ ရာကယ်တင်နိုင်ရေ ဆိုရေ လူသားမျိုးဆက် တည်တံ့ရီးလောကပါလတရားနန့် အညီ ခုခံကာကွယ်လီကတ်ရဖို့ စွာပါဗျာယ်။

စစ် ဆိုရေ အသံကို လူအများစုက မကြားချင်ကတ်ကေလေ့ ကမ္ဘာ့သမိုင်းစာမျက်နှာတိကို လှန်ကြည့်လိုက်ကေ စစ်ပွဲတိကင်းစင်ရေ နှစ်ကာလရာစုက မတွိရသလောက် ရှားပါရေ။ ဘီစီ ၅၄၄-၄၉၆ ခုနှစ်ကာလက တရုတ်တွေးခေါ်သျှင်ကြီး ဆင်းဇူး (Sun Tzu) က ကျူးကျော်ရန်စသူရို့ ကို ဇာပိုင်တွန်းလှန်တိုက်ထုတ်နှိမ်နှင်းရဖို့ လဲ ဆိုစွာကို စစ်ပွဲအနုပညာ (The Art of War) ဆိုရေ နာမေနန့် စစ်ကျမ်းစာအုပ်ကြီးရီးပနာ အကြံပီးလမ်းညွှန်မှတ်တမ်းတင် ထောက်ပြခပါရေ။ ဂရိနိုင်ငံရီးဒဿနပညာသျှင်၊ သမိုင်းဆရာ၊ ဗိုလ်ချူပ်ဟောင်း သူစီးဒဒီ (Thucydides) ကလေ့ ဘီစီ ၄၆၀-၄၀၀ ပတ်ဝန်းကျင်မှာ ဒီမိုကရေစီအေသင်မြို့ ပြနိုင်ငံက အင်ပါယာချဲ့ ထွင်အနိုင်ကျင့်ရန်စကျူးကျော်လိုမှုကြောင့် စစ်စွမ်းရည်ပြည့်ဝရေ တော်လှန်ရီးသမားရို့ တိုင်းပြည် စပါတာနန့်  နှစ်ပေါင်းသုံးဆယ်နီးပါးစစ်ဖြစ်ခကတ်တေ ဖလိုပွန်နီရှန်စစ်ပွဲ (The Peloponnesian War) အကြောင်းကို နောင်လာနောက်သားရို့  သင်ခန်းစာယူနိုင်အောင် ဘက်မလိုက်တေ သမိုင်းအချက်အလက်အစုံနန့်  မှတ်တမ်းတင်ရီးသားထားခပါရေ။ အာဏာပါဝါကျယ်ပြန့် လာခြင်း ကြောင့် အင်ပါယာချဲ့ ထွင်ချင်ရေ အေသင်မြို့ ပြနိုင်ငံစွာ နောက်ဆုံးမှာ လက်နက်ချအညံ့ခံပနာ စစ်ရှုံးလားရရေ ကမ္ဘာ့ရှိအကျဆုံးဒေစစ်သမိုင်းဖြစ်ရပ်က ဒမြစရိုက်နန့် အာဏာရူးနိန်ရေ ဗမာစစ်အုပ်စုအတွက် သံဝေဂတရားတိ ဟောပြပီးနိန်ပါရေ။ အိန္ဒိယအတွေးအခေါ်ပညာသျှင် တက္ကသီလာပါမောက္ခကြီး စန္နဂျာ (Chanakya) ကလေ့ အားလုံးပျက်သုဉ်းဆုံးရှုံးနစ်နာစီရေ စစ်ကိုရှောင်ကတ်ဖို့  လောကနိတိကျင့်ဝတ်တိကို ရီးသားချန်ထားခရေ။ ဒေဂန္တ၀င်သုခမိန်ပညာရှိတိအားလုံးက လူတိုင်းကိုဒုက္ခရောက်စီရေ စစ်ကိုထိန်းချူပ်ပနာ ဆင်ခြင်တုံတရားနန့်  နိုင်ငံရီးပြဿနာကို အဖြေရှာကတ်ဖို့  တိုက်တွန်းခကတ်တေ။

သူစီးဒဒီ (Thucydides) က အေသင်ရို့ အာဏာပါဝါကျယ်ပြန့် လာခြင်းရေ စစ်ပွဲကို ရှောင်လားလို့ မရအောင် လုပ်လိုက်တေ (“The growth of the power of Athens made war inevitable.”) လို့ စစ်ဖြစ်ရရေအကြောင်းရင်းကို ထောက်ပြပနာ အာဏာရူးခြင်းက အေသင်ရို့ ကို နိဂုံးချူပ်လားစီလို့  အသိတရားရကတ်ဖို့ ပြောခပါရေ။ စန္နဂျာ (Chanakya) ကလေ့ စိုင်းစားဆင်ခြင်ဥာဏ်မဲ့ရေ ဘုရင်စွာ ရန်သူတိလက်ထဲကို အလွယ့်ကာချေကျလားတတ်ပနာ တခါလေ့ အသိတရားဟိ နိုးထလာဖို့ မဟုတ် (A reckless king will easily fall into the hands of his enemies. Hence the king shall ever be wakeful.) လို့  ပြောခပါရေ။ တရုတ်တွေးခေါ်သျှင်ကြီး ဆင်းဇူး (Sun Tzu) က တခုပိုင်လေ့ ရှောင်လားလို့ မရရေ စစ်ပွဲဖြစ်ပါလတ်ကေ အနိုင်ရအောင် ဇာပိုင်တိုက်လားဖို့ လဲဆိုရေ စစ်မဟာဗျူဟာတိအကြောင်းကို သူရီးထားခရေ စစ်ပွဲအနုပညာ (The Art of War) စာအုပ်မှာ လမ်းညွှန်ပြခပါရေ။ ဗီယက်နမ်အမျိုးသားဂေါင်းဆောင်ကြီး ဟိုချီမင်းက သူ့ အရာရှိတိလေ့လာသင်ယူနိုင်ဖို့  စစ်ပွဲအနုပညာ (The Art of War) စာအုပ်ကို ဘာသာပြန်ပီးခပါရေ။ အမေရိကန်နန့် ပြင်သစ်စစ်တပ်ရို့ ကို တိုက်ထုတ်ဖို့  ပြောက်ကျားစစ်ဗျူဟာချခရေ ကမ္ဘာကျော်ဗီယက်နမ်ဗိုလ်ချူပ် Võ Nguyên Giáp ကလေ့ ဆင်းဇူးအတွေးအခေါ်တိကို စိတ်အားထက်ထက်သန်သန် နန့် လေ့လာလိုက်စားကျင့်သုံးခရေ ကျောင်းသားတစ်ယောက်ဖြစ်ခပါရေ။

ရှိကျရေ ခရစ်ယာန်တွေးခေါ်မှုထဲမှာ အလယ်ခေတ်ဒဿနပညာသျှင် စိန့် သြဂတ်စတိုင်းအမြင်က ကျူးကျော်ရန်စခြင်း၊ မတရားသိမ်းထားခရေ နယ်မြီကို ပြန်ပနာ သိမ်းယူခြင်းကို ခုခံဆန့် ကျင်ခြင်းနန့်  အမှားလုပ်နိန်စွာတိကို ပြန်ပျင်လားဖို့  ဒဏ်ခတ်တေစစ်ပွဲတိစွာ တရားရေစစ်မှာ ပါရေ (In early Christian thought, St Augustine’s view of just war included defence against aggression, repossessing that which is taken dishonestly and punitive war to redress wrongdoing.) လို့  ထောက်ပြပြောခရေ။ စစ်စွာ နိုင်ရေလူကိုလေ့ အကျိုးမဖြစ်ထွန်းစီ (war could not even benefit a victor.) ဆိုကတ်ကေလေ့ ဗမာစစ်သွီးကြွအုပ်စုပိုင် မျက်ကန်းဆဆီမကြောက်တေလူတိအတွက်က စစ်ပွဲဆိုစွာ သူရို့ အသက်ရှင်ရပ်တည်ပနာ အာဏာမြဲလားရီးအတွက် အသုံးချခံ ပစ္စည်းတခုဖြစ်နိန်ရေ။

မွီးရာပါနိုင်ငံရီးအခွင့်အရေးမရကတ်လို့  အမျိုးသားလွတ်မြောက်ရီးတိုက်ပွဲဆင်နွဲယင်းနန့်  ဖြစ်ပါလတ်ရရေ နိုင်ငံရီးပဋိပက္ခကို နိုင်ငံရီးနည်းနန့် အဖြေရှာဖို့ မကြိုးစားပဲ မုဒိမ်းကျင့် လူသတ် ဒမြတိုက် ရွာတိကိုမီးတိုက် လယ်သိမ်းမြီသိမ်းလုပ်ပနာ စစ်ရာဇ၀တ်မှုတိ လူသားမျိုးနွယ်ကိုဆန့် ကျင်ရေ ပြစ်မှုတိကို ကျူးလွန်နိန်ကတ်တေ ဗမာစစ်သွီးကြွဗိုလ်ချူပ်တိကတော့ကေ တိုင်းရင်းသားလူမျိုးတိုင်းနန့်  စစ်မျက်နှာဖွင့် စစ်ဆင်ပါလတ်တေခါ ဒုတိယကမ္ဘာစစ်ကာလက ဟစ်တလာဂေါင်းဆောင်ရေ လူမျိုးရီးအစွန်းရောက် နာဇီဂျာမန်ရို့  စစ်နယ်ချဲ့ ခြင်းနန့် တထေရာတည်းတူပါလတ်တေ။ တရွာလုံးနန့် တယောက်ဆိုရေပိုင် အားလုံးသူနန့် စစ်ဖြစ်ပါလတ်တေခါ စစ်ပန်းလာပြီးကေ သုဿန်စခန်းမှာ သီပန်းပွင့်လားရရေ နာဇီစစ်တပ်ပိုင် ဗမာစစ်တပ်လေ့ နီဝင်ချိန်ပါးပါလတ်ပါဗျာယ်။

လူမျိုးတစ်မျိုးတည်းထဲမှာ နိုင်ငံရီးစနစ်နန့် အုပ်ချူပ်ရီးယန္တရားကို ပြောင်းလဲချင်ကတ်လို့  မတူရေ အိုင်ဒီယာ သဘောတရားတိကို ကိုင်စွဲပနာ အာဏာပြိုင်နန်းလုကတ်ခြင်းကြောင့် ဖြစ်လာရရေ ပြည်တွင်းစစ် (Civil War) ပဋိပက္ခအဆင့်ကို ကျော်လွန်ပနာ ဗမာကိုလိုနီစနစ်ဖျက်သိမ်းရေးနန့် တိုင်းရင်းသားလူမျိုးတိလွတ်မြောက်ရေး (Decolonization and National Liberation Movement) အဆင့်ကို ရောက်ပါလတ်တေ ဂနိကာလနိုင်ငံရေးပြဿနာကို ဖြေရှင်းဖို့ က အင်္ဂလိပ်နယ်ချဲ့ နန့် ဖက်ဆစ်ဂျပန်ရို့ ကို တိုက်ထုတ်ခကတ်တေပိုင် လူထုဦးဆောင်ပါဝင်ရေ လူထုတော်လှန်ရေးနန့်  ဗမာနယ်ချဲ့ ကို အငုတ်ချေတောင်မကျန်လိုက်အောင် တိုက်ထုတ်လီကတ်ရဖို့ စွာပါဗျာယ်။ ဗမာစစ်သွီးကြွနယ်ချဲ့ ကျူးကျော်သူရို့  ထိုးစစ်ဆင်သမျှကို ခုခံနိန်ရေ ထုတ်သုံးနိန်ကျဗျူဟာကို ပြန်ပျင်ပနာ လိုအပ်ကေ ဗမာစစ်စခန်းတိကို လက်ဦးမှုယူပနာဝင်သိမ်း၊ ဗမာစစ်တပ်၏၀င်ငွေလမ်းကြောင်းနန့် ရိက္ခာတိဖြည့်ပီးနိန်ရေ လမ်းကြောင်းတိကိုဖျက်၊ ဗမာတိနိန်ရေ တိုင်းဒေသကြီးတိလေ့ စစ်မြီပြင်တိဖြစ်လာပနာ စစ်ပြီးဒုက္ခသည်တိ နန့် ပြည့်နိန်ပြီးကေ ထိန်းမနိုင်သိမ်းမရ ဗမာအုပ်ချူပ်ရီးယန္တရားပျက်လားအောင် လုပ်လာကတ်ရပါဖို့ ။

ဒေကမ္ဘာမြီထက်မှာ တိုင်းပြည်နိုင်ငံတိဖြစ်ပေါ်တိုးတက်လာခြင်းသမိုင်းကို လေ့လာကြည့်လိုက်ကေ တန်ခိုးသြဇာအာဏာအရှိန်အ၀ါမြင့်တက်လာခြင်းနန့် ပြိုလဲပျက်စီးပျောက်ကွယ်လားရခြင်း၊ အင်ပါယာရို့ ၏ နီထွက်ချိန်နန့် နီဝင်ချိန်၊ အတက်အကျ အမြင့်အနိမ့်ဟိရေ သမိုင်းသံသရာတိနန့် ပြည့်နိန်စွာကို လားတွိရပါရေ။ စကော့တလန်က နိုင်ငံရေးဒဿနပညာသျှင် ဒေးဗစ်ဟုမ်း (David Hume) က သမိုင်းဆိုစွာရေ ဖြစ်ပျက်သံသရာလည်ပနာ ထပ်ကာတလဲလဲဖြစ်လာတတ်ပြီးကေ ငြိမ်းချမ်းရေးနန့် လွတ်လပ်တေအချိန်ကာလတိနောက်ကို စစ်ပွဲနန့် အာဏာသျှင်တိက ပုံမှန်လိုက်ပါလာတတ်တေ (History is cyclical, with periods of peace and freedom being regularly followed by war and tyranny.) လို့ ပြောခရေ။ ရခိုင်ရို့ ရေ နှစ်ပေါင်းငါးထောင်ကျော် တည်ငြိမ်အီးချမ်းဖွံ့ ဖြိုးတိုးတက်တေ ရခိုင်ရို့ ခေတ် ရခိုင်ရို့ ရာစုကို ထူထောင်ဖြတ်သန်းလာခကတ်ပြီးကေ ထင်မထားရေ သမိုင်းတကွေ့ မှာ ဒမြ၀င်အတိုက်ခံခရရေပိုင် ဗမာရို့ ၏ကျူးကျော်နယ်ချဲ့ သိမ်းပိုက်ခြင်းကို ခံလိုက်ရလို့  စနစ်တကျ ဂုတ်သွီးစုပ်ထားခြင်းကြောင့် နာလန်ပြန်မထူနိုင်ရေ အခြေအနေကို ရောက်နိန်ကတ်ရရေ။ ဟိရေအားနန့်  ရုန်းထပနာ ဗမာကိုလိုနီစစ်စနစ်ဆိုးနန့် ဆိုးသွမ်းလွန်းရေ ဗမာအုပ်ချူပ်ရီးကို ဒေရာစုမှာ နိဂုံးချူပ်ပီးလိုက်နိုင်ကေတော့ လူ့ ဂုဏ်သိက္ခာ လူ့ တန်ဖိုးနန့် လွတ်လပ်ခြင်းကို ပိုင်ဆိုင်ရေ ရခိုင် ပြန်ဖြစ်လာပါဖို့ ။ ရခိုင်ရို့ ကို ခေတ်သမိုင်းအဆက်ဆက်ဒုက္ခပီး အနိုင်ကျင့်လာရေ ဗမာစစ်တပ်လေ့ ကမ္ဘာ့လူ့ အသိုင်းအ၀ိုင်းမှာ ဒမြဂိုဏ်းသာသာ သိက္ခာမဟိရေ လက်နက်ကိုင်အဖွဲ့  အဖြစ်နန့် ရပ်တည်ပါလတ်ရစွာရေ အဂုဆိုကေ အမိုက်ဇာတ်သိမ်းဖို့ နီဝင်ချိန်ကို ရောက်ပါလတ်ပါ ဗျာယ်။ ဒေနှစ်ထောင့်ဆယ့်ခြောက်စွာ ဗမာစစ်သွီးကြွရို့  သီပန်းပွင့်လာနိုင်ရေ သုဿန်စခန်းဖြစ်လာဖို့  လမ်းစကိုလှမ်းပနာ မြင်လာရရေ အဂုပိုင်ကာလမှာ အမျိုးချစ်ခြင်းကို လက်တွိထုတ်ပြဖို့  ရခိုင်အမျိုးသားလွတ်မြောက်ရီးလှုပ်ယှားမှုကြီးကို ဆင်နွဲကတ်ဖို့  ရက္ခိတရို့ ကို တော်လှန်တပ်ဦးက နိုးဆော်နိန်ပါယင့်။

 

ခိုင်အောင်အောင်

၁၂၊၃၊ ၂၀၁၆

 

Share